Home is also where the taste is…

Aug 22

Written By eda hung

多謝富士山，認識咗 Kelvin（爸爸）！真心好多謝佢咁支持本地電影，仲做金主包場，我先有得去睇《廚師發辦》首映，好開心。

睇完真係喜出望外，D 演員都做得好好，有驚喜！係一部久違了嘅香港愛情小品電影（前排先討論緊以前有《小親親》、《向左走向右走》嗰 D....）。

輕微劇透：點名幾位驚喜演員

Crystal（張紋嘉 / 前 HotCha）： 估唔到佢做單親媽媽角色咁自然！玩 dating app 個下猶豫不知繼唔繼續見面嘅細膩心理，同埋之後同男主角、D 女嘅互動都做得好好。
克克（盧鎮業 / 小野）： 上次睇佢係《夜王》斯文賤格嘅形象，今次做斯斯文文嘅廚師，做板前手勢同廚房手功都真係睇得下！
馬騮摵（Monkee）： 飾演師妹嘅佢，臨尾要拆夥嗰場戲，欲言又止但又唔想冇朋友做個 closeup 鏡頭，將內心嘅矛盾感發揮得極好，唉...

故事淡淡咁用 Omakase 去連結現今愛情、友情，同埋香港呢幾年發生嘅現象，亦深層討論咗關於人生嘅決擇同取捨。

睇完第二朝，我終於喊咗出嚟

呢套戲對我當然非常有共鳴。熟我嘅人都知，我以前差唔多每晚都會返去同熊媽媽食飯，每晚都係佢揸 fit。佢總係可以變到好多好好味嘅餸菜，隔日就會有湯飲，這對我嚟講 exactly 係「熊媽媽發辦」，直到佢開始病... the rest is history...

好好彩嘅係，我一直都好明白煮一餐飯需要幾多心機，所以我成日都有誇獎讚賞佢，I have never taken it for granted.（在此又要繼續多謝咁多年嚟投餵過我嘅親朋戚友！）

Follow Your Heart

同埋克克最後都 follow his heart 繼續做佢想做嘅嘢，見住佢繼續揸住架 Campervan 喺台南遊走，正！同 Isabel 講「eee 都係我嘅人生 wor 都係我想做 wor」（hahaha，不過講真，都係要有 washroom 嘅 campervan 好 d，就好似熊爸爸喺 New Zealand 個架咁！）。